© FCCI 2024. All Rights Reserved.
About
Tuahmi pa 3 (Mission)
Pathian thangthat, zumtu bawibawih dungthluntu tuah, Thuthangtha sim. (Praise, serve by making disciples, and preach the Gospel)
Sunmang (Vision)
John 14:6, Jesuh in “Keimah cu lamzin le thutak le nunnak ka si. Keimah hnen in siar lo zohman ka Pa hnennah an thleng thei lo."Jesuh dungthluntu sintu dungthluntu tuah. (Making disciples who make disciples)
Man Sunglawi (Values)
Thuthangtha muril (Gospel Centered), Nung Thianghlim (Holiness), Duhdawtnak (Love), Thlacam nun (prayerfull life), Pumpek nun (Sacrificial living).
Hnatuandan (Strategy)
Thlacam tlang (mass prayer), timtuah tlang (planning), Pathian thangthat tlang (corporate worship), Thuthangtha sim (Preaching the Gospel), Pathian Thutak zirh (teaching the Gospel), Dungthluntu tuah (Making disciples), bulpak nun kaihhruai (coaching, mentoring), crusade and campaign, Mission feh.
Hlawhtlinnak tehfung (measurement of success)
Input (khawm, sumpai thawhzat, kawhhran program cangvaihnak), rahsuah-piangthar, rundamnak ngah zat, rawngbawltu tha suak, missionary, pastors, zumtu pitling nun nei, le a hngawrmi rahsuah (impact result), leitlun pum Pathian uknak karhzaiter.
Pathian thangthat (Praise God)
Zumtu bawibawih
(Serve Others)
Thuthangtha Sim
(Preach the Gospel)
Church Pastor
Rev.Hre Mang, Ph.D.
- hremang@gmail.com
- 3175191836
Innsang: Nupi- Nu Lynda Tumpar, B.E., M.E. Civil Engineer
Fapa: Ginny Zalan Mang, B.E. Civil Engineer, Moses Mang- College Student
Nulepa: Pu Tial Hlei Kap, Pi Satin Par (Tleicia)
Unaua Suahpi: Nu Sen Ro Hei, Pa Tha Luai Thang, Nu Mang Dawi Sung (Tleicia), Fl. Siang Ngun Tlem (Tleicia), Nu Tial Cin Sung, Pa Za Biak Mang, Saya Kei Ngun Lal, Nu Kei Tial Mawi, Pa Mang Biak Khum
Suahnak khua: Zawlte, Falam peng, Chin State
Tlawngkai dahnak: TlawngZawl (Primary), Tibual Middle School, Falam High School (No.1), Hakha High School (No.1), Mandalay University, Delhi University, Aizawl Law College, Grace Bible College, Cohen Theological Seminary, Hartwick College, Indiana University and Purdue University, Tennessee Temple University.
Mandalay University a kai lai ah Kawlram pumpi University tlawngta cangvaihnak, Kawl ralkap uknak duhlo cangvaihnak ah a tel ruangah Kawlram suahsan in ramleng ah a feh suak mi a si. Kachin ram ah Chin phunsang tlawngta pawl thawn an feh hnu ah India ram, Bangladesh ram pawl ah ramkhel dothlennak hnatuan in a no lai can rak hmangtu a si.
Aizawl, Mizoram, India ah 1998 ah, Lynda Tum Par thawn Lai Christian Fellowship (LCF) ah thitumnak thiang in neih awknak an neih hnu ah fapa pahnih Ginny Za Lan Mang le Moses Cung Hlei Mang an nei. 1992 ah Chin phunsang tlawngta pawl lak ah pahtlang theih lomi harsatnak buainak a um ruangah dothlennak pawlkom suahsan in phunsang tlawngkai a pehzom. India ramah Bible tlawng kai in B.Th. & M.Th. Theology a zir suak. India ram a um lai ah Chin refugee pawl hrangah hnatuan theutu asi. Chin refugee pawl harsatnak leitlun miphun dang theih dingin 1999-2000 ah research a rak tuah ih cabu suah in refugee pawl harsatnak thu tlang a rak aupi. Aizawl ah Chin Refugee education assistance program tla tawlrel in Chin refugee rak bawmtu asi. Chin Refugee Committee ah tla tuanvo latu a rak si. India a um laiah Chin ramkhel pawl pawlkom Chin National Council (CNC) ah tuanvo kaitu a rak si. New Delhi ah Falam Union, Falam milesa funkhawm awknak dintu lakah a tel.
Kum 2000 ah US Congress ih tuahmi “Burma Student Activist” pawl hrangah an pekmi scholarship ngah in phunsang tlawng kai peh dingin US ah a feh. Cutin phunsang tlawng kai a pehzom vivo ih USA ah Political Science (B.A.) cu Harwirck College, Oneonta, New York ah a a zirsuak degree a lak. Master of Public Affairs (M.P.A.) cu Indiana University and Purdue University in Indianapolis (IUPUI) ah zirsuak in degree a ngah. Ph.D. in leadership cu Tennessee Temple University ah (2011-2015) kum 5 sung a zir suak hnu ah degree a lak. USA ah Indiana State cozah hna kum 7 sung a tuan hnu ah Falam Christian Church of Indianapolis ah pastor a tuan.
USA thlen hnu khalah Chin Pawlpi USA ah nasa ten Chin miphun hrangah pumpe in hna tuantu a si. America ramah Chin New Year festival tua hmaisabik 2002, Batle Creek, Michigan ah tuanvo latu lakah telve in miphun hrang, community hrang pupetu asi. Chin Pawlpi USA pawlkom ah 2002-2009 tiang Executive Committee member, Assistant Secretary, General Secretary tuanvo kai in pastor a tuan hlan Chin community hruaitu lakah a rak tel ringring. Ramleng Chin mi tamnakbik, Indianapolis ah a ummi Chin mi zate kom pawlkom, Chin Community of Indiana ah president, vice president, board of directors’ chairman ti pawl tla tuanvo a rak kai.
Chin mi lak lawng si loin America mi lakah volunteer hantuan theutu a si. Asian American Alliance ah board of directors tuanvo tla a rak kai. 2013 ah United Way in Volunteer Diversity award a rak ngah. Chin mi lakah ziang hrinhnam, peng le tlang, biaknak pawlkom thleidan um lo ten mi riantu, miphun duhdawttu, miphun lungrualnak suahtertu, funkhawmtu a si. Thu tha hla tha suahpi in lungrualnak duhtu, tawlreltu a si ringring. 2020 ah Chintube in “The Most Influencial Person of the Year” Laksawng an pek. American ram siseh leitlun hmun tintiah ah Chin mi pawl thathnemnak ruat in Chin miphun pawl hnenah thuthangtha sim in siseh community thansohnak hrangah siseh khawruah bawmtu zirhtu a si.
Cabu suah mi:
1) The Plights of Chin Refugees in India (English)
2) The Chin Leadership (Mirang)
3) Hruaitu Kutkaih
4) Tipithuanthum Parih Ka Mitthli
5) Kawhhran,”
6) Nun Thianhlimnak” (Lehmi), pawl tla an si.
Zohṭhimtlakbik asinak (2022 January – 2023 June) sungih a hlawhtlinnak le thilṭha tuah mi (Zohṭhimtlakbik a sinak) pawl” a tu fang a tuan rero lai mi an si.
Perry Township School Board. Nov. 2022 US rampum hril awknak ah Perry Township School District ah election ah a zuam ve ih USA ah kawlram mi Chin American lole Burmese American mi lakah US election ah hriltlin hmaisa bik si in hriltlin asi. Perry Township School District ah school 24 a umih Student 16,000 lenglo an um, culakah Chin mi students 5,000 lenglo an um. School Board mi 7 an umih seat 3 a lawngmi hrang election ah candidate mi 7 an cuh aw ih vote tampi ngah in hriltlin asi. USA ah Chin miphun tamnak bik khua Indianapolis ah Chin miphun hmaihruaitu asi ih nauhak pawl tlawngkainak Primary ihsin High School tiang tlawng uktu tlawng bawi lakah a tel ban mi, Chin miphun ih pa pakhat asi. Chin miphun hmaihngalnak, Chin student 5,000 lenglo pawl thazang petu le USA cozah tlawngah Chin mi hnatuan tampi um thei dingin siseh Chin ca USA cozah tlawng ah zir theih dingin a zuam rero lai asi.
Advisor to the Chin Community of Indiana. America ram Chin mi tambik umnak Indiana ih Chin Community pawlkomah advisor in ruahnak petu, lamhmuhtu, volunteer in hnatuantu asi. Tuihlan ah President, Vice President, Board Chairman tla a rak tuan dahtu asi.
Member of Board of Directors, Chin Pawlpi USA. Chin Pawlpi USA ih Board of Directors Member pakhat asi.
Board of Director Member of Indianapolis Theological Seminary. Pathian thutak zirnak, Master level zirhtu tlawng, Chin pastor le zumtu mi ziangmawzat Pathian thu zirnak, Theological Seminary ah miphun tintian lakah upat tlak Board of directors’ member, laireltu Phunsang tlawngbawi pakhat asi ve.
Minister Council Member of CBANA. America ram Chin mi biaknak pawlkom asimi Chin Baptist Association of North America ah Ministers Council member asi.
Vice President of Crossroad Baptist Association. Kawhhran 90 lenglo pawlkom asimi Crossroad Baptist Association, Southern Baptist Convention ah Vice President tuan rero laitu asi. Chin kawhhran zumtu pawl hrangah lamzin hmuhtu sulsatttu asi.
Vice President of Cobblestone Homeowner Association. Chin mi inn 150 lenglo umnak veng, Cobblestone veng homeowner association ah Chin miphun pawl zawnruat in a tel ih Vice President tuanvo kaitu asi.
Executive Director of Myanmar Baptist Churches USA (MBCUSA). American ram Southern Baptist Convention hnuai ah dinmi, Myanmar Baptist Churches USA ah June 12, 2023 ah Executive Director ah hriltlin a si. Kawlram mi Baptist Church 140 lenglo Southern Baptist Convention ah an mi pawl pawlkomnak fellowship hruaitu a si.
Member: Board of Director, Perry Township Education Foundation. Perry Township District fimthiamnak lam khawkhangtu, foundation pakhatah board of director member asi.
Miphun zawnruat in Online social media, Facebook (followers 23,000 lenglo hennah) siseh,YouTube (video 1000 lenglo retmi nei in). Chin miphun zawnruahnak ruangah thuthatha simsintu, ruahnak petu asi. Online Facebook in Chin miphun hrang fundraising a tuahmi cu June 2023 ah $72,000 lenglo a kim zo. Chin miphun zawnruahnak neitu, peng le tlang, miphun, biaknak pawlkom thleidan nei loin miphun duhdawttu zawnruattu a si.
Rev. Hre Mang cu Chin miphun zapi te lungrualnak hrang hnatuan rerotu a si. Peng le tlang, biaknak pawl, zovek khal thleidan nei loin duhdawtnak in riantu, pumkhat sinak duhtu, lungrualnak hrang pumpetu asi. Miphun dang lakah Chin miphun lamzin sialsaktu, lamzin hmuhtu, zohthimtlak Chin miphun in kan neih mi Falam mi in kan neihmi pa pakhat a si.
Rev. Hre Mang, Ph.D. ih fim zirnak
Rev. Hre Mang, cu Kawlram ah Mandalay University a kai laiah 8888 timi 1988 ih Kawlram pum buainak, Student Democracy movement ah telin Chin ralkap tuan in a rak feh suak ruangah tlawngkai theh loin ramleng ah a pehzom sal. A hnuailam pawl hi a zirsuahmi pawl a si.
- Batchelor of Theology (B.Th.). Grace Bible College, Gurgaon, Haryana, India (1993-1996)
- Master of Theology (Th.M). Cohen Theological Seminary, India Campus, Gurgaon, Haryana, India (1996-1999)
- Batchelor of Political Science (B.A.). Hartwick College, New York, USA (2000-2002)
- Master of Public Affairs (M.P.A). Indiana University Purdue University at Indianapolis (IUPUI), Indiana, USA (2003-2005)
- Ph.D. in leadership. Tennessee Temple University, Tennessee, USA (2010-2015)
Rev. Hre Mang cu kum note lai ihsin kawlram suahsan in ram le miphun hrang nunnak thaap in pumpetu a rak si hlei ah tuini tiang Chin miphun hrang lamzin dangdang in pumpetu, miphun zawnruattu a si. Pastor a tuan hnu khalah Chin miphun hrang pumpe aw in community ah hnatuan dan lamzin dangdang in Chin miphun hrang pe aw tu asi. Biaknak lamah siseh community lam ah siseh Chin miphun pumkhat sinak duhtu, lamzin dangdang in miphun hrang hnatuantu a si.